1ܣܵܒܵܒ ܟܲܕ ܐَܚܹܪَܢܵܐ ܠܵܐ ܚܡܸܠܲܢ؛ ܒܣܸܡܠܵܐ ܠܲܢ ܠܸܦܝܵܫܵܐ ܫܒܼܝܼܩܹܐ ܒܐܵܬܹܢܘܿܣ ܒܢܲܦ̮ܫܲܢ؛ 2ܘܫܘܼܕܸܪܲܢ ܠܟܸܣܠܵܘܟܼܘܿܢ ܠܛܝܼܡܵܬܹܐܘܿܣ ܐܵܚܘܿܢܲܢ؛ ܚܸܠܡܲܬܟܵܪ ܕܐܲܠܵܗܵܐ ܘܦܵܠܵܚܵܐ ܥܲܡܲܢ ܒܡܲܫܚܲܕܬܹܗ ܕܡܫܝܼܚܵܐ؛ ܕܡܲܩܘܹܐ ܠܵܘܟܼܘܿܢ؛ ܘܝܵܗ݇ܒܸܠ ܠܵܘܟܼܘܿܢ ܠܸܒܵܐ ܥܲܠ ܗܲܝܡܵܢܘܼܬܵܘܟܼܘܿܢ؛ 3ܕܐ݇ܢܵܫܵܐ ܡܸܢܵܘܟܼܘܿܢ ܠܵܐ ܦܵܝܸܫ ܫܥܝܼܫܵܐ ܒܐܲܢܹܐ ܐܘܼܠܨܵܢܹ̈ܐ؛ ܣܵܒܵܒ ܐܲܚܬܘܿܢ ܒܝܼܕܲܥܝܵܐ ܝܬܘܿܢ ܕܠܐܵܗܵܐ ܡܘܼܬܒܼܹܐ ܝܘܵܚ. 4ܣܵܒܵܒ ܐܘܼܦ ܟܲܕ ܠܟܸܣܠܵܘܟܼܘܿܢ ܝܼܘܵܚ ܗ݇ܘܵܘ؛ ܩܵܕ݇ܡܵܝܬܵܐ ܐَܡܸܪܲܢ ܐܸܠܵܘܟܼܘܿܢ؛ ܕܗܕܝܼܪܹܐ ܝܘܵܚ ܠܸܦܝܵܫܵܐ ܡܘܼܠܝܼܨܹܐ؛ ܕܵܐܟܼܝܼ ܕܒܝܼܕܲܥܝܵܐ ܝܬܘܿܢ ܕܗَܘܹܐ ܠܵܗ̇. 5ܣܵܒܵܒ ܕܐܵܗܵܐ ܐܘܼܦ ܐܵܢܵܐ؛ ܟܲܕ ܐَܚܹܪ݇ܢܵܐ ܠܵܐ ܚܡܸܠܝܼ؛ ܫܘܼܕܸܪܝܼ ܕܝܲܕܥܸܢ ܗ݇ܘܵܐ ܗܲܝܡܵܢܘܼܬܵܘܟܼܘܿܢ؛ ܠܵܐ ܗ݇ܘܹܐ ܕܓ̰ܵܪܸܒ ܠܵܘܟܼܘܿܢ ܓ̰ܵܪܒܵܢܵܐ؛ ܘܗܵܘܹܐ ܓ̰ܵܦܲܢ ܒܹܐ ܦܲܝܕܵܐ. 6ܐܝܼܢܵܐ ܐܵܕܝܼܵܐ؛ ܡ̣ܢ ܕܐَܬܹܐܠܹܗ ܠܟܸܣܠܲܢ ܛܝܼܡܵܬܹܐܘܿܣ ܡܟܸܣܠܵܘܟܼܘܿܢ؛ ܘܡܘܼܫܚܸܕܵܚܠܹܐ ܥܲܠ ܗܲܝܡܵܢܘܼܬܵܘܟܼܘܿܢ ܘܚܘܼܒܵܘܟܼܘܿܢ؛ ܘܕܐܝܼܬ ܠܟܸܣܠܵܘܟܼܘܿܢ ܕܟܼܵܪ̈ܲܢ ܛܵܒܼܵܐ ܒܟܠ ܥܕܵܢܵܐ؛ ܘܫܘܼܗ݇ܘܸܬܹܐ ܝܬܘܿܢ ܠܸܚܙܵܝܲܢ؛ ܕܵܐܟܼܝܼ ܕܐܘܼܦ ܐܸܠܵܘܟܼܘܿܢ؛ 7ܣܵܒܵܒ ܕܐܵܗܵܐ ܦܸܫܠܲܢ ܝܘܼܗ݇ܒܹܐ ܠܸܒܵܐ ܒܝܼܵܘܟܼܘܿܢ؛ ܐܵܚܘܿܢܘ̈ܵܬܲܢ؛ ܒܟܠܵܝܗܝ ܥܹܩܘܼ̈ܘܲܢ ܘܐܘܼܠ̈ܨܵܢܲܢ ܒܝܼܸܕ ܗܲܝܡܵܢܘܼܬܵܘܟܼܘܿܢ. 8ܣܵܒܵܒ ܐܵܕܝܼܵܐ ܒܸܚܵܝܵܐ ܝܘܵܚ؛ ܐܸܢ ܐܲܚܬܘܿܢ ܟܵܠܝܼܬܘܿܢ ܒܡܵܪܲܢ. 9ܣܵܒܵܒ ܡܘܼܕܝܼ ܫܵܟܲܪܬܵܐ ܡܵܨܵܚ ܠܸܦܪ̈ܲܥܝܵܐ ܡܒܵܕܵܠܵܘܟܼܘܿܢ ܠܐܲܠܵܗܵܐ؛ ܒܘܼܬ ܟܠ ܚܲܕܘܼܬܵܐ ܕܒܸܚܕܵܝܵܐ ܝܘܵܚ ܣܵܒܵܒ ܕܝܼܵܘܟܼܘܿܢ ܩܵܕ݇ܡ ܐܲܠܵܗܲܢ؛ 10ܟܲܕ ܦܲܪܦܸܠܵܚ ܒܘܼܫ ܙܵܘܕܵܐ ܒܠܲܝܠܹܐ ܘܒܐܝܼܡܵܡܵܐ؛ ܕܚܵܙܵܚ ܦܵܬܵܘܟܼܘܿܢ؛ ܘܬܲܡܸܡܵܚ ܡܸܢܕܝܼ ܕܒܵܨܘܿܪܵܐ ܝܠܹܗ ܒܗܲܝܡܵܢܘܼܬܵܘܟܼܘܿܢ؛ 11ܐܝܼܢܵܐ ܐܲܠܵܗܵܐ ܒܵܒܲܢ؛ ܘܡܵܪܲܢ ܝܼܫܘܿܥ ܡܫܝܼܚܵܐ؛ ܬܵܪܹܨ ܐܘܼܪܚܲܢ ܠܟܸܣܠܵܘܟܼܘܿܢ؛ 12ܘܡܵܪܝܵܐ ܡܲܙܝܸܕ ܘܡܲܦܪܹܐ ܚܘܼܒܵܘܟܼܘܿܢ ܕܚܲܕَ ܠܟܸܣ ܕܗ̇ܘ ܐَܚܹܪَܢܵܐ؛ ܘܕܠܟܸܣ ܟܠ ܐ݇ܢܵܫܵܐ؛ ܕܵܐܟܼܝܼ ܕܐܲܚܢܲܢ ܟܹܐ ܡܲܚܸܒܵܚ ܠܵܘܟܼܘܿܢ؛ 13ܘܡܲܩܘܹܐ ܠܸܒܵܬܵܘ̈ܟܼܘܿܢ ܕܠܵܐ ܠܵܘܡܵܐ ܒܩܲܕܝܼܫܘܼܬܵܐ ܩܵܕ݇ܡ ܐܲܠܵܗܵܐ ܒܵܒܲܢ؛ ܒܐَܬܵܝܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܥܲܡ ܟܠܵܝܗܝ ܩܲܕܝܼܫܘܼ̈ܗܝ.